VIANEN (Vianino)
Cme podrisia mi scorder al paes ca ma ospitè in ti prim ani ed la me vita:lu
le semper in t’al me coeurr;ag veuj ben a Vianen…per mi le al pu bel fiur dun
bel giarden.
Quand a pensi al me paes mi al ved davanti a mi,al ved d’infonda a la stre con
i so du campanil.
A ved Vianen cun la so genta cla lavura e la s’insigna:brava genta cla paghè
cun al sango e cul dulur per aver la libertè.
Tant temp fa ag serin in tant e prima ancura ed pu,ma incoeu,purtroppo, ien
poc ,cui ca e restè lasù.
Mi ogni tant serc ed turner:a go i me mort d’ander a cater,a go i ricord chim
fan penser.
A pas insima al ri Sanel e m’incameni su per la stre e intant ca pensi a
quanti voti ed ded li a son pasé,
A m’acorsi ed quant bei fiur ca ghe ancura,tut culuré,da teur su e da purter,
cme un temp,un po pu avanti a la maesté.
Po a ghe i pen suta la cesa,ien chersù bumben:ieva piantè,dopa la guera,quelc
giunvot sensa lavour e mi a pas cun nustalgia d’un temp can turna pu.
Finalment a riv in piasa,a ghe Sarafon cun i gelati,a ghe Frandon cun el so
scherpi,a ghe la Melia coi buton e Tomaso e la Gigina is dividen la pupulasion,
a ghe la pelta e am vena in ment Arnaldo,du osterii Rissio e Tunen,un calsuler
ciamè Catulo e un ufisi pustel.
Du campanil,una cesa,un castel smis,na tura medioevela,na mucia ed ca vuna
atacheda a cletra
e i fiur in sima ai balcon i fan ster ben la situasion.
Se as gira per la cesa a ghe un monument:
Le un suldè ed la prima guera e a pera cal staga atent che nison an faga
nienta ed mel a la so tera!…..
Al pera propria ed sentinela e con una bomba in man
Al minacia chi ga intension ed fer dal mel ai so paisan.
Da Vianen suma partì in tant pral mondo
A suma andè in serca ed furtona;
e pasè tant temp urmei e i cavì ien quasi bianc………
Ma al coeur ed cul ragas al pensa semper al so paes e al se riveda cme una
vota in sima al pont
Dal Risanel.
Nessun commento:
Posta un commento